तिहारको झिलिमिली
-देवीचरण सेडाईँ
फूल फुल्यो सयपत्री तिहार झिलिमिली
लिपिपोती बाहिर भित्र पार झिलिमिली
वर्षदिनमा आउने तिहार मनाउन पाउँदा
भइदिन्छ आँगनको झार झिलिमिली
सेल रोटी मिष्ठान्न र अचार भागमा हुन्छ
शुद्ध हुन्छ बोली वचन उद्गार झिलिमिली
लाइदिने दिदीबहिनी टीको निधारमा
भेला हुँदा हुन्छ घर द्वार झिलिमिली
यमराजको पूजागरी भाग सारिदिन्छन्
बनाइदिने दाजुभाइको निधार झिलिमिली ।